PRESINTATION

L'OFFICE ED TOURISSME, association de l' loi ed 1901, all' a vu l' jour in 1989, all' rest' dins les biaux locaux du Catiau d' Flers, qu'min du Cat Botté, 59650 à Villeneuve d'Ascq.

Téléphone : 03 20 43 55 75 Fax: 03 20 91 28 28

Ches bureaux i's sont ouverres du mardi au vinderdi ed 9 h à 12 h 30 et d' 14 h à 18 h et l'sam'di de 9 h à 12 h.
Sin but preume ch'est d'assurer l' promotion des atouts touristiques de l' vill', insan.ne avec les institutionnels publics ou privés, et d' favoriser l' découverte d' gramint d' richesses touristiques, historiques et culturelles... de l'ville.

L'Office ed tourisme, est ar'lié par chl'arnitoile aux OTSI de ch' Nord et de ch' Pas de Calais.
Te peux arsaquer et ravoir l'insan.ne des informations touristiques de l' région, et un puque, ch'est gramint d'informations sur nou pays grâce à ch' réseau "Bonjour" de l' Fédération Nationale ed z'Offices ed tourismes.

Alorss, si qu' te veux découverre incore puque nou région, busier à t' prochain's destinations "vagances" t'as qu'à passer à l'Office ed tourisme.

Si qu' te viends in carète

In traversant Villeneuve d'Ascq par ch' boulevard du Breucq ( Route nationale 227) te prinds l'sortie Flers Câtiau, pis te suis l' direction Flers Câtiau. Te prinds tout drot au Rond point, pis l' deuxième à gauche de l' Cheval'rie . T'arrête t' carète t'as de l'plache à gauche. T'y est te vos l'câtiau à chint mét's, accessible seul'mint à piés.

Si qu'te viends in autocar

Soit qu' te prinds l' ligne 1 in direction des quat' cantons. te deschinds à l' station d' métro Pont d' Bos. Ch' l'autocar liméro 41 ou 10 (i s'in va tous les dix minutes) i t'amène en chinq minutes à l'arrêt Câtiau. t'as pus qu'à faire chint mét's et t'arrife au Câtiau d' Flers.
Soit qu' te prinds l' ligne 2. Te deschinds à Fort d' Mons. L'autocar liméro 10 in direction de l' station Pont d' Bos t'amène à l'arrêt Câtiau. t'as pus qu'à faire chint mét's et t'arrife au Câtiau d' Flers.

CHES MUSÉES ET CH' PATRIMOINE

L' Câtiau d' Flers

Construit in 1661, ch' prestigieux câtiau rural caractéristique d' l'architecture flamande, abrite l' Musée Archéologique qui proposs' tout au long d' l'année des espositions temporaires

L' Forum des Sciences

4000 m2 pou mieux comprinde not' mond' d'aujord'hui marqué par ches sciences et ches technologies sous forme d'espositions temporaires pou tertous; Incontournable, ch' Planétarium

L' Musée d'Art Moderne

Ch'ti qu'i' l'a créé ch'est l'architect' Roland Simounet. Ch'musée y abrite l'prestigieuss' donation Masurel qui comprint des ouvraches de Braque, Van dongen, Laurens, Léger, Miro, Modigliani et Picasso et proposs' durand l'année des espositions temporaires. Attintion l'musée y a clos l'huche jusqu'in 2009, pou des ouvraches d'estention et d'modernisation.

L' Musée des Molins - ARAM

Va à l'rincont' des molins et ravise un insan.ne* vraimint biau : 2 molins su pivot aveuc un tordoir in état d'marche, un martinet hydrolique, des mécaniques variées, des meules et l'musée des molins y artrace leu histoire technique.

* ensemble

Asnapio

Ch' parc d'arconstructions archéologiques s'étind su 6 hectares dins l'zone ed nature du parc du Héron. I' artrace l'évolution d' l' habitat dins l'Nord ed d'la France, du Néolithique à l' fin du Moyen-Ache (ouverre in avril jusquà octobe).

L'Musée du Terroir

Li i' s'trouff' dans eun' cinse au carré du 18é siècl', ch' musée i' évoque l' vie dins les villaches du Mélantois au 19é siècl' aveuc l'arconstruction d'eun' cuisine, d'eun' cambe et d' z'ateliers d'auterfos...

L'Mémorial Ascq 1944

Ch' musée rappelle par eun' collection d' photos, d'affiches et d'objets, l'ramintevrance* des victimes du Massacre d'Ascq in avril 1944, où 86 hommes du villach' fuchtent éxécutés par un convois d'SS in prov'nance du front Russe. Aujord'hui ch'est aussi un lieu ouverre pou la paix.

* souvenir

L'Musée ed' l'école

Ch'ti qui l'a créé ch'est M. Notardonato, L' musée i' arconstitue eun' salle ed classe du début du XXé Siécl'.

L' Pavillon d'Nature

Ch' Pavillon d' chasse ch' t'un dorlo** d' l'architecture classique du XVIIé s iècl' dins un écrin d' verdure. I' accueille l'antenne villeneuvoisse de l'Espace Naturel Lille Métropole.

** bijou

L' Villa Gabrielle et sin gardin médiéval

L' Gardin médiéval qui s 'visite uniqu'mint su d'mande. L'rest' du bâtimint y est visipe uniqu'mint à l'estérieur.

L' Musée d'Plein Air

Ech' site présinte l'z'habitants des secteurs géographiques des Flandres et dins eun' moind'e m'sure ed l'Artois. S' n' estinsion prind in compte des zones éloignées comm' l'Hainaut, l' picardie vire l' Dan'mark et devrot s'étinde su 24 ha.

L' Musée d'Egyptologie

L' musée i' détient eun' importante collections d' dorlos, d' trucs funéraires et d' céramiques du IIIé millénaire au XVé siècl' avant not' ère ( su rindez-vous uniqu'mint).

Un Patrimoine religieux ermerquab'

Aveuc ches égliches : Saint Pierre du Bourg, Saint Sébastien d'Annappes, Sacré Coeur du Sart, Saint Pierre d'Ascq, de l' Nativité et de l' Cousin'rie.

L'Nature

Villeneuve d'Ascq, véritape poumon vert de l' métropole, i offère gramint d' lieux d' pourménates aveuc ches 30 km d' quémins piétonniers, ech' cainne* ed 6 lacs, ches parcs l' zone naturelle de 120 ha, s' colline aux 120000 arpes... L' ville all'est même traversée par un quémin d' Grante Randonnée( fiche disponipe à l'Office ed' Tourisme Villeuvos)

* Chaîne

L' Ferme du Héron

All' accueille l' grand public, l' z'écoles et l' z'associations pou d'z'activités d'initiation à l' découverte ed l'invirronn'mint. All' proposse régulièr'mint des visites guidées alintour du lac du Héron su l' thème de l'faune et de l'flore à destination des familes et d'z'individuels.

L' Verger Conservatoire

A coté de l' ferme du Héron, l' Verger conservatoire ch'est un musée vivant de l'pomme où les techniciens de ch' cintre Régional d' R'ssources génétiques préserf't et étudient l' z' anciennes variétés fruitières in vue d' leu réintroduction dins l' commerce. Rinseign'mint à l' ferme du Héron.

L' Réserv' Naturelle Volontaire du Héron

All' a vu l' jour in 1995, all' couvre 73 ha.all' permet aux pourmeneurs ed ' découverre l' long des pieds-sintes d' z'ambiances naturelles.

L' Parc du Héron

I' constitue eun' transition unique inter l' milieu urbain et l' site agricole préservé. L' lac du Héron d'36 ha, artificiel à l'origine y est dev'nu rade* un lieu ù ch'est épanouie l' nature. I' ofère eun' grant' richesse ornithologique : 200 espèces d'ojiaux i' sont observées jusq' achteur, car l' site ch'est un important lieu de halte ou d' passache des ojiaux migrateurs.

* vite

L' Colline des Marchenelles

Créé artificiell'mint aveuc l' terres d' déblai du lac du Héron, all' couvre 25 ha dont 10 ha d' forêt ( au total 120000 arbes d'essence régionale).

L' Parc Urbain

A coté du musée d'art moderne, lieu d' préférince des coureurs à piès et des pourménades in famile. Les cintres d'intérêt de ch' parc sont gramint et variés : poney-club, espace ed 'jux, aires ed' pique-nique, quémins boisés.

El' Lac du Câtiau et l'lac ed z'Espagnols

Près du câtiau d' Flers et du stadium Lille Métrople, un aut' lac i' t'invite à l'pourmenate, plus modeste que l' aut's mais qui, pou chti qu'i' l' souhaite, peut ét' l' début de l' cainne des 6 lacs in passant pa l' passer'lle qui amène vers el' lac ed'z'espagnols, qui t'immène li-même au lac Saint Jean...jusqu'au lac du Héron.

L' HISTOIRE

In 1969, l'Etat y a décidé d' créer dins l' Métropole Lilloisse eun' des 9 villes nouvieles au plan. L' choix i' s'est porté su l'Est ed Lille in raison d' l'existince ed vastes zones agricoles et l' présince de l' cité scientifique qui a ouverre en 1965.
Les conseils municipaux des 3 communes, Ascq, Annappes et Flers, décident de fusionner.
L' nouviele commune prind l'nom d' Villeneuve d'Ascq in hommage à l' mémoire des 86 victimes d'Ascq du 1er avril 1944. Gramint d' quartiers i's z'ont été construits alintour des tros villaches et in 1983 atteint s' pleine maturité, abandonnant sin statut d' ville nouvielle.
In 1988, l' ville a queusi pour logo el sphère bleue pou s' diminsion technologique et l'feulle verte pou l' respect ed l'invironnemint.

Eun' paire ed chiffres

L' Naissance des Lacs

Née au coeur de l' basse vallée d' la Marque, l' ville nouviele all' est implantée su l' dernière plaine alluviale inondab'. Eun' telle situation all' a nécessité l' creus'mint d' plusieurs lacs destinés à collecter les iaux d' pluie. L' parc Urbain et l' parc du Héron i vientent s' greffer à ches étindues d'iau.

Les Jum'laches et r'lations internationales

BON À SAVOIR

Pou mieux vous arpérer dins l' ville :
Chaque nouviau quartier d' Villeveuve d'Ascq y a donné s'n initiale au nom d' chacune ed ses rues : rue de L' Cimaise, rue de l' Convintion ch'est dins l' quartier de l' Cousin'rie : dins l' quartier du Triolo, te treuf'ras l'Quémint des Tailleurs, de l' rue Talma.

L'équipe ed l'office ed tourisme all' t' attind et t'informe pou l'organisation et l'agrémint d' tin séjour.
Les bureaux i's sont ouverre du mardi au vinderdi d' 09h00 à 12h30 et d' 14h00 à 18h00 et l' sam'di d'09h00 à 12h00.

Un grand merci à l'association "Toudis Simons" pour la traduction
228 ter rue Clemenceau
59139 WATTIGNIES
Tél : 03 20 97 35 76
www.toudissimons.org